Mama

link ng kinuhanang larawan: https://www.pinterest.ph/pin/528328600019878128/

Noon, sabik akong makita si mama dahil tuwing magbabakasyon lang kami sa Bicol nagkikita. Mabait si mama saka di siya nakakapagsalita. Palagi niya akong hinahainan ng cookies at gatas gabi-gabi. Minsan, naaalimpungatan ako kapag padampi-dampi niyang hinahawi ang aking buhok kahit nakatalukbong ako ng kumot.

Sa totoo lang, medyo takot pa ako kay mama. Napakamisteryoso niya kasi. May mga oras na maririnig mo siyang umiiyak at ang tunog ng kaniyang mga luha ay parang pumapatak sa malalim na balon at bigla ding titiigil. Oo, alam kong ispiritu si mama, multo kung tawagin pero mabait siya.

Kaya alam kong malungkot si mama. Matagal na din namang namatay ang tunay kong nanay kaya nabili ni papa itong bahay para gawing bakasyunan upang makalimot. Dito na namin naabutan si mama.

Isang gabi, sa isang kwartong walang laman, naririnig ko ang pag-usog ng platito at baso sa sahig kaya binubuksan ko ang pinto. Tatambad sa akin ang dalawang cookies at isang baso ng gatas. Pagkatapos kong kumain, iiyak na naman si mama. “Mama, tahan na po. Miss ko din po kayo.” Saka na ako matutulog at ganoon ulit ang Sistema.

Minsan akong dinala ng aking kakulitan sa attic. Doon ko nakita ang isang lumang diyaryo, kung saan naka-impenta ang lumang bahay-bakasyunan namin. At ang pang-ulong balita, “Dalawang bata ang patay matapos lasunin ng kanilang sariling ina, habang ang kanilang ina ay nagbigti.”

Natigilan ako nang marinig ko sa aking likuran ang pag-usog ng platito at baso. Ngayon, ayoko nang magbakasyon sa lumang-bahay na iyon.